काठमाडौँ । नेकपा (माओवादी केन्द्र)ले पदाधिकारीहरूको जिम्मेवारी हेरफेर गरेसँगै चार प्रदेशका नयाँ इन्चार्जहरूले सम्बन्धित प्रदेशबाट प्रतिनिधित्व गर्ने केन्द्रीय सदस्यहरूसँग छलफल थालेका छन् ।
आइतबार अध्यक्ष पुष्पकमल दाहाल प्रचण्डले पदाधिकारीहरूको जिम्मेवारी हेरफेर गरेको प्रस्ताव केन्द्रीय कमिटी बैठकबाट अनुमोदन गरेका थिए ।
जिम्मेवारी पाएलगत्तै सोमबार पार्टी कार्यालय पेरिसडाँडामा सुदूरपश्चिम, गण्डकी, मधेस र कर्णाली गरी चार प्रदेशका नवनियुक्त इन्चार्जहरूले केन्द्रीय सदस्यहसँग छलफल गरेका हुन् ।
‘नयाँ र पुराना इन्चार्जहरू बसेर केन्द्रीय सदस्यहरूको कार्यविभाजन र कार्यक्षेत्रको बारेमा प्रारम्भिक छलफल भयो । छलफलपछि साउन मसन्तभित्र आफ्ना कार्यक्षेत्र र जिम्मेवारी सम्बन्धमा केन्द्रीय सदस्यहरूले लेखेर पठाउन
निर्देशन दिएको छ’, केन्द्रीय कार्यालयका सचिव डोरप्रसाद उपाध्यायले जानकारी दिए ।
एउटै प्रदेशमा ७०/८० जना केन्द्रीय सदस्य भएकाले कार्यविभाजन गर्न सजिलो होस् भन्नलाई सो निर्देशन दिएको उनको भनाइ छ । उनका अनुसार अर्को बैठक सम्बन्धित प्रदेशले नै गर्नेछ ।
आजको बैठकमा नयाँ र पुराना इन्चार्ज बसेर छलफल गरेको उनले बताए । इन्चार्जसँगको छलफलपछि भूगोलमा रहेका केन्द्रीय सदस्यहरूको जिम्मेवारी तोकिने छ । यसैगरी केन्द्रीय लेखा आयोगमा ७ सदस्य थपिएको उपाध्यायले जानकारी दिए ।
छलफलमा सुदूरपश्चिमका इन्चार्ज डिलाराम आचार्य, गण्डकीका देवेन्द्र पौडेल, मधेसका लीलामणि पोखरेल र कर्णालीका मातृका यादव सहभागी थिए । उनीहरूले आ–आफ्ना कार्यक्षेत्रमा गएर परिणाम देखिने गरी काम गर्न सदस्यहरूलाई निर्देशन दिएका थिए ।
छलफलमा पुराना इन्चार्जहरू मधेस प्रदेशबाट गणेश साह, गण्डकीका हितराज पाण्डे, कर्णालीमा कालीबहादुर मल्ल र सुदूरपश्चिममा खगराज भट्ट सहभागी रहेका सचिव उपाध्यायले जानकारी दिए ।
अध्यक्ष पुष्पकमल दाहाल प्रचण्डले आइतबार पदाधिकारीहरूको जिम्मेवारी हेरफेर गरी केन्द्रीय कमिटी बैठकबाट अनुमोदन गराएका थिए ।
जसअनुसार कोशी प्रदेशमा चक्रपाणि खनाल, मधेस प्रदेशमा लीलामणि पोखरेल, बागमतीमा जनार्दन शर्मा, वर्षमान पुन विशेष प्रदेश इन्चार्ज, देवेन्द्र पौडेल गण्डकी, हितमान शाक्य लुम्बिनीको इन्चार्ज भएका छन् ।
यसैगरी मातृका यादव कर्णाली, डिलाराम आचार्य सुदूरपश्चिम, गिरिराजमणि पोखरेल उपत्यका सम्पर्क समन्वय, राम कार्की प्रवास इन्चार्ज भएका छन् ।
यसअघि कोशी प्रदेशमा राम कार्की, मधेस प्रदेशमा गणेश शाह, बागमतीमा हितमान शाक्य, गण्डकीमा हितराज पाण्डे, लुम्बिनीमा चक्रपाणि खनाल, कर्णालीमा कालीबहादुर मल्ल र सुदूरपश्चिममा खगराज भट्ट इन्चार्ज थिए ।
श्रोत : रातोपाटी
