काठमाडौँ, १५ पुसः नेपाली सेनाको छाउनीस्थित वीरेन्द्र अस्पतालले आफ्नो स्थापनाको १००औँ वर्ष पूरा गरेको छ । सो अवसरमा सोमबार प्रधानसेनापति महारथी अशोकराज सिग्देलको प्रमुख आतिथ्यमा जङ्गीअड्डास्थित सभामण्डपमा विविध कार्यक्रम गरी वार्षिकोत्सव समारोह सम्पन्न भएको हो ।
सैनिकका रूपमा राष्ट्रपतिको कर्तव्य र स्वास्थ्यकर्मीका कठिन जिम्मेवारीलाई कुशलतापूर्वक निर्वाह गरी वीरेन्द्र अस्पतालको चिकित्सा क्षेत्रमा विशेष योगदान पु¥याउने प्रथम कमाण्डिङ अफिसर वरिष्ठ शल्यचिकित्सक प्राविधिक सहायक रथी मदनमान मल्ल र मेट्रोन प्राविधिक प्रमुख सेनानी विन्दु श्रेष्ठलाई प्रधानसेनापतिद्वारा सम्मान गरिएको थियो ।
अस्पतालका ‘कमाण्डाण्ट’ प्राविधिक सहायक रथी डा नम्रता रावलले स्वागत मन्तव्य राख्नुभएको कार्यक्रममा बलाधिकृत, बलाध्यक्ष, बहालवाला तथा अवकाश प्राप्त रथीवृन्द, अधिकृत, सैनिक श्रीमती सङ्घका पदाधिकारी, विभिन्न अस्पताल एवं सरकारी तथा गैरसरकारी सङ्घसंस्थाका प्रतिनिधि लगायतको उपस्थिति थियो ।
शतवार्षिकी कार्यक्रम मनाउने क्रममा यही पुस १३ गते छाउनीस्थित वीरेन्द्र अस्पतालको प्राङ्गणमा प्रधानसेनापतिबाट नवनिर्मित वीर स्मारकको अनावरण गरिएको नेपाली सेनाले जनाएको छ ।
R.S.S
