काठमाडौँ, २६ पुसः नेपाली कांग्रेसको शुभेच्छुक संस्था नेपाल प्रेस युनियनमा आबद्ध पत्रकारहरूले भोलिदेखि सुरु हुने दोस्रो विशेष महाधिवेशनले पार्टीभत्र एकताको सन्देश दिनुपर्ने बताएका छन् ।
विशेष महाधिवेशन पक्षधरद्वारा पुस २७ र २८ गते हुन लागेको विशेष महाधिवेशन मिडिया सेन्टरले आज यहाँ आयोजना गरेको परामर्श कार्यक्रममा पत्रकारहरूले विशेष महाधिवेशनले एकताको सन्देश दिनुपर्ने बताएका हुन् ।
नेपाल प्रेस युनियनका पूर्वअध्यक्ष कुलचन्द्र वाग्लेले विशेष महाधिवेशनले सबैलाई मिलाएर अगाडि लैजानुपर्ने बताउनुभयो । नेपाल पत्रकार महासङ्घका पूर्वअध्यक्ष हरिहर विरहीले नेपाली कांग्रेसमा राष्ट्रियता परिपक्व नीति अपनाएको भन्दै सही नीतिलाई नेतृत्व गर्न सही नेता आउनुपर्ने बताउनुभयो ।
प्रेस युनियनका पूर्वअध्यक्ष रमेश तूफानले कांग्रेसको विधान धारा १७ (२) ले राजनीतिक संस्कारलाई बोकेको भन्दै यसलाई सहज रूपमा स्वीकार गर्नुपर्ने बताउनुभयो ।
प्रेस युनियनका सल्लाहकार तेजप्रसाद पण्डित, अनिता बिन्दू र दामोदरप्रसाद दवाडीले विशेष महाधिवेशनले पार्टी फुट्छ भन्ने भाष्य स्थापित पार्न खोजेका भन्दै यस प्रयत्नलाई निस्तेज पार्न सञ्चारकर्मीको महत्त्वपूर्ण भूमिका रहेको बताउनुभयो ।
युनियनका उपाध्यक्ष जीवन भण्डारीले सुझावका लागि कार्यक्रमको आयोजना गरिएको र सोहीअनुसार विशेष महाधिवेशनको मिडिया सेन्टरमार्फत सत्यतथ्य समाचार उपलब्ध गराइने बताउनुभयो ।
