काठमाडौँ । लगानी बोर्ड नेपालले छिटो छरितो रुपमा सेवा प्रवाह गर्न एकल विन्दु सेवा केन्द्र सञ्चालनका लागि गृहकार्य सुरु गरेको छ ।

बोर्डले राष्ट्रिय तथा अन्तर्राष्ट्रिय लगानीकर्तालाई थप आकर्षित गरी लगानी वृद्धि सहज बनाउन एकल विन्दु सेवा केन्द्र सञ्चालन गर्न लागेको हो । लगानी बोर्डले एकल विन्दु सेवा केन्द्रको संयोजन गर्ने कार्यका लागि सहसचिव हेमराज तामाङलाई तोकेको छ ।

एकल विन्दु सेवा केन्द्रसँग समन्वय गरी कार्य अघि बढाउन १४ वटा सरकारी निकायले अख्तयारीसहित फोकल पर्सन तोकेका छन् । जसमा भूमि व्यवस्था, सहकारी तथा गरिबी निवारण मन्त्रालय, भौतिक पूर्वाधार तथा यातायात मन्त्रालय, वन तथा वातावरण मन्त्रालय, नेपाल राष्ट्र बैंक, अध्यागमन विभाग, आन्तरिक राजस्व विभाग, उद्योग विभाग,खानी तथा भूगर्भ विभाग, भन्सार विभाग, श्रम तथा व्यवसायजन्य सुरक्षा विभाग, विद्युत् विकास विभाग, कम्पनी रजिष्ट्रारको कार्यालय र नेपाल दूरसञ्चार प्राधिकरणलाई बोर्डले तोकेका अरू निकायहरूले पनि फोकल पर्सन तोक्ने भएको छ ।

बोर्डको कार्यालयले एकल विन्दु सेवा केन्द्रका लागि सम्बन्धित मन्त्रालय, विभाग एवं निकायहरूसँगको समन्वयमा कार्यविधिको मस्यौदा तयार पारेको छ ।

बोर्डले तत्कालका लागि सम्बन्धत मन्त्रालय/निकायका फोकल पर्सनसँग समन्वय गरी कार्य अघि बढाउनेछ ।

लगानी बोर्डका प्रमुख कार्यकारी अधिकृत सुशील ज्ञवालीले जेनजी आन्दोलनका क्रममा बोर्डको कार्यालयमा आगजनी भएको हुँदा नयाँ कार्यालयको व्यवस्थापन र कार्यविधिले अन्तिम रुप पाएपछि एकै ठाउँबाट सेवा प्रवाह हुने बताए । अटोमेसनबाट काम हुने हुँदा प्रविधिको प्रयोग महत्त्वपूर्ण भएको उनको भनाइ छ ।

फोकल पर्सनहरूसँगको छलफलमा प्रमुख कार्यकारी अधिकृत ज्ञवालीले लगानीसम्बन्धी राष्ट्रिय लक्ष्य प्राप्ति र सुशासन कायम गर्नका लागि अपनत्व लिएर काम अघि बढाउन अनुरोध गरे। ’लगानी बोर्डले सबैसँग समन्वय गरेर काम गर्छ । यसमा सबै निकायहरूको साथ र सहयोग अपेक्षित छ,’ ज्ञवालीले भने ।

विज्ञ रामकृष्ण सापकोटाले धेरै निकायहरूबाट सेवा प्रवाह गर्नु पर्दा लगानीकर्तालाई झन्झटिलो हुने भन्दै एकल विन्दु सेवा केन्द्रको कार्यान्वयनले लगानीकर्तासँग सम्बन्धित कार्य चुस्त रुपमा हुन सक्ने बताए ।

अहिलेका लागि फोकल पर्सन सम्बन्धित मन्त्रालय/निकायको सिंगल प्वाइन्ट अफ कन्ट्याक्ट हुनेछन् । उनीहरूले लगानी बोर्डको कार्यालयबाट सिफारिस भएका आ–आफ्नो निकायसँग सम्बन्धित कार्यहरू सम्पादन गर्नमा सहजीकरण गर्नेछन् ।

लगानी बोर्डका सहसचिव हेमराज तामाङका अनुसार फोकल पर्सनले सार्वजनिक निजी साझेदारी ऐन २०७५, सार्वजनिक तथा लगानी नियमावली २०७७ र लगानी बोर्डको रणनीति तथा व्यावसायिक योजनाले तोकेका सेवा प्रवाहसम्बन्धी कार्यहरू गर्न सहयोग पुर्‍याउनेछन् । यस्तै उनीहरूले लगानी बोर्डको कार्यालयबाट प्राप्त फाइल तथा पत्रको समयमै राय प्रतिक्रिया दिने, कार्यरत निकाय तथा लागनी बोर्डको कार्यालयबिच पुलको काम गर्ने, संस्थागत समन्वयकर्ताको भूमिका निर्वाह गर्नेलगायत कार्य गर्नेछन् ।

- Ratopati